支持及訂閱請按 Like

星期日, 7月 27, 2008

捷克令大陸頭痕

捷克總理將佩戴有雪山獅子旗襟章出席北京奧運
2008-07-27 HKT 01:16

捷克外交部表示,總理托波拉內克出席北京奧運會時,會佩戴印上雪山獅子旗的襟章,引起中方關注。

外交部發言人奧普萊塔洛娃表示,捷克已經向中方保證,並無改變對西藏問題的立場。她又說,有關兩國外交出現緊張的報道,是誇張的說法。

捷克總理托波拉內克較早前表示,接納捷克奧委會邀請,在8月13日出席北京奧運,支持參賽的捷克運動員。

最令大陸政府頭痕的國家,唔係美、德、英、法、日等一等強國,而係好似捷克這類二、三等強國--講杯葛捷克嗎?叫左出來都冇乜作用,捷克在內地又冇「家樂福」可以畀你包圍;經濟合作不是沒有,而是影響力不高,就算全面抵制捷克貨,對佢地的損失又真係大到可以嚇怕人嗎?

最頭痕係今日的捷克入左歐盟,歐盟呢類「聯盟」,最令大陸政府無解--又冇一個「集體強權」可以「談判施壓」,對方是一個主權國家,這類小型示威的行動,歐盟根本管唔到,但反過來中國如果太過份,又隨時引起歐盟廿七國強烈反彈,就算德、法、英等沒有動作,北歐等人權國家、其他小國以至東歐的新興國家,根本唔賣你中國帳,講到尾,隻眼開隻眼閉原本就係最好的策略,搞得「國際盛事」奧運會,個心靈同心態仲係停留在「革命年代」,當然結果就係自己搵自己笨,一鋪膠過一鋪。

由跑聖火膠到搞民族主義,到真係民族上腦排隊買飛打交,連記者都打埋一份,類似膠到冇朋友,亦冇人信,亦冇人識處理的問題,隨時陸續有來;幾張印個朱紅印的硬膠廿蚊紙,炒到萬幾兩萬銀,事實證明世上真的無奇不有。

提起捷克,就不得不提一段歷史小插曲;話說第二次世界大戰之後,捷克和三萬三人口的歐洲郵票小國列支敦士登--神聖羅馬帝國最後一個大公國--過唔去,共產捷克沒收了列支登士敦大公約 1600 平方公里(略大於香港)的貴族土地,甚至禁止列支敦士登國民入境,相反列支敦士登就收留了五百個納粹時期效力德國的俄軍,為左這樣膠到冇朋友的事,大家又反目成仇左幾十年,有見及此,林忌認真建議大陸政府應承認列支敦士登大公在捷克的土地作為回應,大家膠鬥膠。

同時內地高幹應該授權列支敦士登,推出「神聖羅馬帝國中華奧運紀念小型張」限量版,讓中國人大舉訂購,雙方肯定發過豬頭--試想想,印著查理曼大帝、又或者奧圖一世等完全既不神聖,亦不羅馬,更不是帝國的皇帝,持有著毛主席像,肯定謂為世界奇觀,讓中國國內最少一億的「毛迷」發狂--即使羅馬不是希臘,即使神聖羅馬帝國不是羅馬帝國,反正也不打緊,最緊要鬼佬--再加上奧運,就立即升值百倍千倍,保證排隊打交永不落空,而傳媒派的記者,只要不是黃皮膚黑頭髮,亦保證不會有武警公安打打殺殺--打鬼佬好大罪o架,打中國人就唔同呢.......

頭痕了,好同情那些未膠得哂的北大人,面對即將破裂的戰略局面,真係頭痕再頭痕再頭痕......

熱門文章

最新文章

  • 由妖票到乞票 - 近期常有些政治人物,不斷「屌票」,即自己作為候選人,不但沒有用耐性去說服選民,反而走去怒罵自己的選民,這種作風當然不但無法爭取別人支持,反而罵走選民。 但另一個極端,就是認為自己那一票真的「非常寶貴」,認為有如一位萬眾觸目的美女,要多次追求,乞求其投票,以至開出大量動人吸引自己的承諾,或者作出利益交換,才會走...
    5 年前

最近文章

再次伸延閱讀